Kushandidzana kweMapurisa neveruzhinji koderedza kuparwa kwemhosva mudunhu reKwekwe

30 Jul 26

Munyori :Tonderai Mari

Mapurisa eZimbabwe Republic Police mudunhu reKwekwe vakafora vachitaridzira mashandiro nekutsanangura Client service Charter yavo kusimbisa kushandidzana nenharaunda mukudzivirira nokuderedza kuparwa kwemhosva

Vachitaura pagungano raisanganisira vagari vemuKwekwe ,vatungamiri vemakereke pamwe nemadzishe emudunhu iri Ishe Malisa ,Ishe Samambwa naIshe Ruya , mukuru wemapurisa mudunhu reKwekwe va Ison Chapeta vakati ivo kushandidzana kwemapurisa neveruzhinji kwakosha mukuderedzwa kwemhosva .

Dunhu iri rakanga rine mukurumbira wekuurayana kwevanhu ,asi zviitiko izvi zvaderera zvikuru.

‘’pandakasvika muno mudunhu reKwekwe vanhu vayiurayana sevanouraya huku, asi pandakagara pasi nemadzishe aya ,ndoda kuti ndikuudzei kuti Silobela ndiyo yave nhamba one .Ndoyakanga iri nhamba one pakuuraya ,asi iye zvino yave nhamba one pakusauraya’’

‘’Ndikakuudzayi iye zvino kuti pamaCases avo ema murder hapana kana one isina musungwa ,zvinoenderana zvakare nekuZhombe ndo the same ‘’

‘’Izvi zvangoitika chete nokuda kwerubatsiro rwenyu nokubatana kwedu imi nesu tichishanda pamwe’’ vakadaro vaChapeta.

Vakatizve mapurisa eZimbabwe Republic Police vakazvipira kushanda zvine rukudzo nehunyanzvi.

‘’donzvo guru redu ndere kuzoratidzira kuzvipira kwedu semapurisa pakubatsira avo vanouya kuzotsvaga rubatsiro kumapurisa.’’

Vakayambira kuti mapurisa akagadzirira kutora matanho nekukasira kune avo vanoda kuratidzira mumigwagwa zvisiri pamutemo.