Vatsigiri venhabvu vofadzwa matambiro emaWarriors

Chikwata chenhabvu cheZimbabwe 17 Nov 24

Chikwata chenhabvu chemuZimbabwe chakabudirira kupinda mumakwikwi eConfederation of African Football (CAF) mushure mokuita mangange nechikwata cheKenya pamutambo wakatambirwa munhandare ye Polokwane munyika yeSouth Africa musi wechishanu 15 Mbudzi 2024.

Chibodzwa chemaWarriors chakamwiswa na Tawanda Maswanhise muchikamu chekutanga mumaminitsi makumi matatu nemaviri, asi muchikamu chepiri Kenya yakadzosera nechibodzwa chakamwiswa mumaminitsi mashanu na Jonah Ayunga.

Mutambo wakapera uri mangange Zimbabwe 1-1 Kenya .

Muboka re Group J maWarriors ave nemapoinzi mapfumbamwe vari pachinzvimbo chepiri ,vachitevera Cameroon iyo iri pamusoro .

Murairidzi wechikwata chemaWarriors Michael Nees akatenda zvikuru rutsigiro rwaakapiwa kubva pazuva rekutanga basa ,akati izvi ndizvo zvayita kuti vasvike pachidanho chavari ichi.

Nees akati hapana vari kupindirira mukushanda kwake.

MaWartriors vakatarisana nemutambo wekupedzisira neCamerron muboka reGroup J.

Zvikwata zviviri zvinenge zvabudirira mumapoka gumi ,ndizvo zvichaenderera mberi kunokwikwidza mumakwikwi achaitirwa kuMorocco gore rinouya.